Belece moje, eko nas opet u jesenskem izdanju.Vrime tako brzo pasiva pa nije čudno ča je konstatirala moja mala pred kojom je cili život: „Ah, za čas sam stara!“ „Da, i to bez penzije“ sam pomislila, ma. Njoj nisam rekla, da je ne deprimiran. A ča, toliko se naokolo govori da današnji mladi neće doživiti životni „pehar“ na kraju radne karijere, a to bi bila ta famozna mirovina. Joh, ne smin njanke pensati na takovu budućnost da mi dica budu sirotinja. Lipo nam savjetuju da se sami moramo brinuti za svoju starost. Ma nemoj? A kako to more biti kad je teško najti delo? Gledaj tamo, puna burza nezaposlenih mladih. Srića da nisu nostalgični i toliko vezani za rodni kraj pak skoro svaki razmišlja kako će partiti u neku stranu državu za moći živiti normalno. Ki zna da li će ih tamo tuđe sunce bolje grijati nego ovo naše. OK, danas je svit povezan i sve je dostupno, ma ipak ja ne bin pošla njanke mrtva. A mladi neka se ranđaju, tako i tako niš ne slušaju, a još manje prihvaćaju savjete fosila. A razmaženi su za popi*diti. To se vidi i kad in ništo skuhaš. Jedan ne voli ovo, drugi ono. Spečeš kolač, staviš cimet jer je zdrav i daje posebni gušt. E ben, mala voli takov ukus, a mali mrzi. On bi mesa, a ona ni čuti. Znate kako ja delan šugo za paštašutu? U dvi posebne teće. Njoj samo šalšu, a za nas ostale z mesom. Maneštru isto tako. Ako mi se ne da kuhati anke nju u dvi posebne pinjate, svi moramo jesti vege. Svekrva reče: „To je žajeb, a ne maneštra. Fućkas ti ako se ne stavi malo pešta ili dva suhi rebri. A od čega će mirisiti la kuća dokle se kuha? “Da, fali domaći štih. Ne kažen da nije dobra, ali nije to to. Ah, sve za tu božju dicu!

Neki dan mi je moja Vesna donesla punu kašetu velikih crlenih šipki. To nisu oni iz Egipta špricani sa pesticidima po dvajset kun kilo, nego njezini domaći iz vrta.

„Aj, Vesna, ča si mi toliko donesla?“ „A šta da radim s njima? Muž i ja jedemo svaki dan, ali klinci neće. Stoka jedna, neće oni ni grožđa, ni smokava, sve mi u vrtu propada. Muž i ja se prežderavamo, ali ne možeš pretjerivati, znaš da me sve deblja. Sutra ću ti donijeti dunje, hahaha, spremi se za proizvodnju!“„Pa Vesna, ča ne učiniš marmeladu? To je super.“