Griški krabunosi

 

Šesno okrabuljani,

poputljani,

grdih nosi

po selih kampanali,

uhucali,

sopli,

pivali,

zvonili,

balali,

v rogi bucali.

 

Orehmani su bili

v kotigah,

sih fel stomanjah,

črljenih, šarih,

i va sarzah.

 

Polešto su vukli nogi,

barilac vina nosili,

kolo pasa lanci,

na glavi rogi

od janjca po užanci.

 

Da se ne vidi lice

priko očih jin mrižice,

po običaju

da se ne utare

kramajuć po celon kraju

pivali su pisme stare.

 

Va sakoj kući su bili,

pozdravljali,

su gošton šalu delali,

žmulji vina praznili

 

jur bi prišlo i do škura,

va birtiji su finili,

na koncu još jedna tura

na fajruntu ku bi spili

 

veseli i malo koma,

črljenih nosi

potle sega, šli bi doma

griški krabunosi

 

Mladen Barac-Ujčić

VOLI SVOJ KOREN