˝Ali krajevi kajkavski i čakavski moraju prvo naučiti govoriti… Oni u nacionalnoj kulturi ne sudjeluju…˝ O dijalektima, nekad po nekome rečeno i napisano.

 

Prišli su čudni meštri. Uz nas k ognjišću seli, slušali naše besede, bi reć, se razumeli, s nami su vino pili i z iste zdele jili, pisali, brojili, krojili, pak, dokli su med nami domaće riči tekli, čudnu su rič rekli. A mi, kot kamik ostali. Ognjišću okolo va velo kolo stali, oči su zasviteli, obrazi ognjen goreli, a naši mudri ljudi ovako govoreli: - Ne! Mi nismo plićak, nit vode ča stoje, nit dica malodobna ka se velih boje, nit zrušeno staro mirišće nit zatvoreno dvorišće van voda bistra, tekuća, beseda živuća. Knjiga smo staroslavna va koj je, va slovi uglaton i najmudriji svit pročital puno toga, ka j' začetak bila, prolići puka ovoga. Dub smo hiljaduletni va kon je velo duplje meda do vrha puno. Roje se zlatne čelice. Žlahtine mi smo rod, refoška i belice, dica bure i mora, sunca i kreševa tvrda. Val nan pred kućun grmi. Za kućun zvone brda pismun ka j' oplodila i trs i zlatni klas. Z davne davnine teče mile sopile glas. Pustite, meštri, besede, da našu brigu i žalost, nevolje naše, ljubavi i kola naše i radost rečemo našin zajikon, besedun na naš mod, glason s kin od pradavni govori vas naš rod.

 

Mi ˝ča˝ govorimo za se, za matere, dicu, braću, a ćete l' vi ili ne besedu našu domaću va vaše kolo prijet, ili ju z kola stirat, delajte! Vi ste zibrani, vi knjige krojite. Stirajte, ako se samih sebe i puka ne bojite! Mi ćemo dalje po našu, va našoj noti prebirat, zač će beseda sama z naše duše čakavska zvirat.

 

Čuj, no! Hrvati smo kot i vi, a more bit i tvrdji. Dlani nan nisu fini, od vaših dlanih su grdji, ma za nas se ne črljenite! Neka vas ne bude sran! Gljedaj jih, se ljudine, Osip, Mikula, Fran!

 

Ne vridjaj se, lipo te prosin, ma moran ti reć, da prostiš, mi smo van puno dali, vi nan malo ili niš!

 

Ako pak zaspravljeć misliš tako kako i pišeš, provaj na gušće med nas, pod naše krovi zać. Živi i umiraj s nami. Od srca k srcu zami, pak se ča med nami čuješ va velon svitu povij. I onda svoju recite: od Boke do Premanture jel' to voda kaljužna ili vrutak kulture!

 

Još jednu našu čuj: kad skupa budete seli, oči živo zaprite. Obrazi tej van gorit kad tako budete čuli same sebe govorit. Riči ingleške, besede latinske, slova Talije, France, z daleke nimške zemlje. Puna sega kolija! Potriba? Ki put, ma sto put oholija!

 

Študiraj, čisti, peri, ča ne valja – razderi, pak potli, kad vi tamo, ljudi učeni i veli čisti narodni glas budete reć umeli, kad budeš pravu rič spekal, pa kad svit od pera ne bude po stranjski jekal, zovite i nas sebi. Mi ćemo glave sokrit i rado va beli grad, va ruhi blagdanjskon prit.

 

Još i to moran reć, poslušaj i ovu malo: poli nas se j' vavik gradilo, a nikad razbijalo!

 

A ako san ti tako se ku i gorku povidal, sadahna mi j' puno lakše. Sad san ti se spovidal.

 

A mi, mat moja, mi ćemo dalje po našu. Za nas je to sveti zajik! Kako da mašimo mašu!

 

 

David Kabalin Vinodolski